Ресей өзге елдерге әскер кіргізуге мүмкіндік беретін заң қабылдап жатыр

Ресейде азаматтарды қорғау мақсатында шетелге әскер енгізуге мүмкіндік беретін заң жобасы бірінші оқылымда қабылданды. Бұл жөнінде BBC-дің орыс қызметі хабарлады. Құжат Мемлекеттік думада қаралған.

Ресей қорғаныс министрінің орынбасары Анна Цивилева заң жобасы президент тапсырмасымен әзірленгенін айтты. Оның сөзінше, құжат шетелде ұсталған немесе қудалауға ұшыраған Ресей азаматтарын қорғауға бағытталған.

Түзетулерге сәйкес, «Азаматтық туралы» заңға шетелде қамауға алынған немесе ұсталған азаматтарды қорғау үшін қажетті шаралар қабылдау нормасы енгізіледі. Ал «Қорғаныс туралы» заңға президентке Қарулы күштерді шетелде, оның ішінде халықаралық немесе ұлттық соттар қудалаған азаматтарды қорғау үшін қолдануға мүмкіндік беретін өзгеріс ұсынылған.

Сарапшылар халықаралық құқыққа сәйкес күш қолдану тек қарулы шабуылға жауап ретінде өзін-өзі қорғау жағдайында ғана мүмкін екенін атап өтті. Олар жаңа түзетулерді қысым көрсету құралы ретінде бағалап отыр.

Бұған дейін Халықаралық қылмыстық сот Ресей президенті Владимир Путин мен балалар құқықтары жөніндегі уәкіл Мария Львова-Беловаға қатысты қамауға алу ордерін шығарған. Сарапшылар жаңа заң бастамасын осы жағдайлармен де байланыстырады.