Ресей мен Украина тағы да қаза тапқан сарбаздардың мәйіттерімен алмасты

Ресей президентінің көмекшісі және Стамбұлдағы келіссөздердегі ресейлік делегацияның жетекшісі Владимир Мединский Ресей мен Украина арасында қаза тапқан әскери қызметкерлердің мәйіттерін алмастыру бойынша кезекті операция өткенін хабарлады.

Оның айтуынша, Ресей тарапы Украинаға 1000 украин сарбазының мәйітін тапсырған. Ал Украина Ресейге 19 ресейлік сарбаздың мәйітін қайтарған.

Бұған дейін 2 маусым күні Стамбұлда өткен келіссөздер барысында тараптар ауыр жараланған сарбаздар мен 25 жасқа дейінгі әскери тұтқындарды, сондай-ақ 6000-нан астам қаза тапқан әскери қызметкердің денесін алмастыру туралы уағдаластыққа келген болатын.

16 маусымда Мединский Ресейдің Украинаға 6060 украин сарбазының мәйітін қайтарғанын мәлімдеген. Өз кезегінде Украина 78 ресейлік жауынгердің мәйітін тапсырған.

Кейін Мединский Ресей тарапы Украинаға тағы 3000-ға жуық әскери қызметкердің денесін беруге дайын екенін жеткізді.

Алайда Украина президенті Владимир Зеленский бұл процесте алаңдатарлық жайттар бар екенін айтып, Ресей тарапы украин сарбаздарының мәйіттерімен бірге Ресей және басқа елдердің азаматтарының денелерін де тапсырғанын мәлімдеді.