Ресей мен “Талибан” әскери ынтымақтастық туралы келісім жасасты

Ресей мен Ауғанстанда билік жүргізіп отырған “Талибан” қозғалысы әскери-техникалық ынтымақтастық туралы келісімге қол қойды. Бұл туралы ресейлік ТАСС агенттігі хабарлады.

Құжат Мәскеу облысында өткен халықаралық қауіпсіздік форумы аясында рәсімделген. Келісімнің нақты мазмұны жарияланған жоқ. Әдетте мұндай құжаттар қару-жарақ, әскери технологиялар мен лицензиялар алмасуды, сондай-ақ бірлескен жобаларды қамтиды.

Форум барысында Ресей Қауіпсіздік кеңесінің хатшысы Сергей Шойгу Ауғанстан қорғаныс министрі Мұхаммед Якубпен кездескен. Ол – “Талибан” қозғалысының негізін қалаушы молла Омардың ұлы. Кездесуде Якуб Мәскеу мен Кабул арасындағы байланыс кеңейіп жатқанын айтқан. Ал Шойгу Батыс елдерін Ауғанстан активтерін бұғаттан босатып, елді қалпына келтіруге қаржы бөлуге шақырды.

Сарапшылар бұл келісімге әртүрлі баға беріп отыр. Шығыстанушы Руслан Сүлейменов The Insider басылымына берген пікірінде құжатты “символикалық қадам” деп атап, Ресей мен “Талибан” арасында ауқымды әскери әріптестік орнатуға нақты алғышарт жоқ екенін айтқан.

“Талибан” 2021 жылы АҚШ әскері Ауғанстаннан шығарылғаннан кейін билікті қайта басып алған еді. 2024 жылы Ресей президенті Владимир Путин талибтерді “терроризммен күрестегі одақтас” деп атаған. Ал 2025 жылы Кремль қозғалысты террористік ұйымдар тізімінен шығарып, Мәскеуде олардың елшісін қабылдады. Тәжікстан, Түркия және Канада “Талибанды” террористік ұйым деп санайды.