"Оңтүстік Африкада ақтарға геноцид жасалып жатыр": Трамптың мәлімдемесі жалған болып шықты

АҚШ президенті Дональд Трамп Оңтүстік Африка Республикасында ақ нәсілді фермерлерге қарсы жаппай қырғын жүріп жатыр деп мәлімдеп, бұл уәжін жалған фотосуреттермен негіздеген. Бұл туралы Reuters агенттігі хабарлады.

21 мамырда Ақ үйде ОАР президенті Сирил Рамафосамен кездескен кезде Трамп ақ фермерлердің өлтірілгенін дәлелдейді-мыс деген фотосуретті көрсеткен. Алайда аталған сурет Оңтүстік Африкаға емес, Конго Демократиялық Республикасына (ДРК) тиесілі екені белгілі болды. Бұл Reuters түсірген, Гома қаласындағы бүлікшілермен қақтығыстан кейін құрбандардың денелерін алып бара жатқан құтқарушылар бейнеленген кадр екені анықталды.

Трамп екінші дәлел ретінде жол бойындағы жүздеген ақ түсті айқыштарды көрсеткен бейнематериалды ұсынған. Ол мұны мыңдаған ақ фермердің моласы деп сипаттаған. Алайда Католикалық ақпарат агенттігінің (KNA) мәліметінше, бұл — 2020 жылы ОАР-дың шығысында өткен наразылық шарасынан алынған көрініс.

Президент Рамафоса Трамптың "геноцид" туралы айыптауларын үзілді-кесілді жоққа шығарды. Ол елде қылмыстық әрекеттер салдарынан зорлық-зомбылық деңгейі расымен жоғары екенін мойындады, бірақ бұл тек ақ нәсілділерге ғана бағытталмағанын атап өтті.

— Адамдар, өкінішке қарай, қылмыстың салдарынан қаза тауып жатыр. Бірақ тек ақ адамдар емес, құрбандардың басым бөлігі – қара нәсілді азаматтар, — деді Рамафоса.

ОАР полициясының ресми дерегіне сәйкес, 2024 жылдың қазанынан желтоқсанына дейін фермерлік аймақтарда 12 адам қаза тапқан, ал ел бойынша жалпы кісі өлтіру саны — 6 953.