Мұнай бағасы 111 доллардан асты

Қара алтын нарығында үлкен дүрбелең басталды. АҚШ пен Иран арасындағы бейбіт келіссөздердің тығырыққа тірелуі әлемдік энергетикалық дағдарыстың жаңа толқынын тудырды. Сарапшылар мұнай жеткізіліміндегі тапшылық енді өте ұзаққа созылуы мүмкін деп қауіптенуде.

Бүгін, 18 мамырда Астана уақытымен таңғы 09:10-да Brent маркалы мұнайдың баррелі 111,16 долларға дейін шарықтады. Бұл небәрі бір апта бұрынғы көрсеткішпен салыстырғанда 6,68%-ға жоғары.

Халықаралық энергетика агенттігі (ХЭА) дабыл қағып үлгерді. Стратегиялық маңызы бар Ормуз бұғазының жабылып қалуы салдарынан әлемдегі мұнай қорлары рекордтық жылдамдықпен таусылып барады.

«Мұнай жеткізу тізбегіндегі үздіксіз іркілістер мен қорлардың күрт азаюы алдағы уақытта бағаның бұдан да сорақы шарықтауына әкелуі мүмкін», — деп ескертті агенттік өкілдері.

Сәуір айында ғана қол жеткізілген әлсіз бітімге қарамастан, Вашингтон мен Тегеран арасындағы текетірес шегіне жетті. Иран тарапы қақтығысқа дейін әлемдік мұнай мен газ тасымалының 20%-ын қамтамасыз етіп келген Ормуз бұғазын бұғаттауды тоқтатар емес.

Ал АҚШ бұл әрекетке жауап ретінде Иран порттарын қоршауға алуды қолдап отыр. Ақ үй басшысы Дональд Трамп кеше жасаған мәлімдемесінде Тегеранға сес көрсетіп:

«Иран үшін уақыт таусылып барады», — деп қатаң ескерту жасады.

 Әлемдік нарық енді не болмақ деген сұрақпен тынысын ішіне тартып отыр.