Meta компаниясы жасанды интеллектіні дамыту үшін 8 мың қызметкерін қысқартты

Facebook, Instagram әлеуметтік желілері мен WhatsApp мессенджерінің иесі — америкалық Meta технологиялық алпауыты компания қызметкерлерінің 10%-ын, яғни шамамен 8 мың адамды жұмыстан шығаратынын мәлімдеді. Бұл шешімнің артында бүкіл әлемді таңқалдырған үлкен себеп бар: компания миллиардтаған қаржыны тірі мамандарға емес, жасанды интеллект (ЖИ) технологияларын дамытуға жұмсамақшы, деп хабарлайды BBC.

Бейсенбі күні Meta басшылығы қызметкерлеріне алдағы қысқартулар туралы ресми түрде хабарлады. Сонымен қатар бұған дейін ашық тұрған мыңдаған бос жұмыс орындарына да енді ешкім қабылданбайтын болды. Мамандардың жаппай жұмыссыз қалуына Meta-ның жасанды интеллектіге салған орасан зор инвестициясы себеп - компания тек осы жылдың өзінде ЖИ жобаларына 135 миллиард доллар жұмсауды жоспарлап отыр. Бұл - соңғы үш жылдағы жалпы шығынмен тең сома.

Жыл басында Meta негізін қалаушы әрі бас директоры Марк Цукерберг жұмыстан шығарудың жаңа толқыны болатынын меңзеген еді. Ол жасанды интеллектінің мүмкіндіктерін өз көзімен көріп, таңданысын жасыра алмаған:

«Жасанды интеллект қызметкерлердің өнімділігін айтарлықтай арттырды. Енді бұрын үлкен команда қажет болған жобаларды бір-ақ адам жүзеге асыра алатын деңгейге жеттік. Меніңше, 2026 жыл ЖИ-дің біздің жұмыс істеу тәсілімізді түбегейлі өзгертетін жылы болады», — деді Цукерберг.

Компанияның ресми өкілі қысқартулар туралы ақпаратты растағанымен, әзірге егжей-тегжейлі пікір білдіруден бас тартты.