Қытай Тибетте алып су электр станциясын сала бастады

Қытай үкіметі Тибет үстіртінде әлемдегі ең үлкен су электр станциясын салуға кірісті. Бұл жоба шамамен 170 миллиард долларға бағаланып отыр. Бөгет Ярлунг Зангбо атты өзеннің бойында салынып жатыр, оған басты себеп бұл өзен 50 шақырым жерде 2000 метрге құлайды, сол себепті электр қуатын өндіруге өте ыңғайлы, деп хабарлайды reuters.com.

Жоспар бойынша, бұл жоба жыл сайын 300 миллиард киловатт-сағат электр қуатын өндіре алады. Бұл — бүкіл Ұлыбритания елінің бір жылда тұтынатын энергиясымен бірдей.

Қытай билігі бұл станция Тибет пен елдің басқа өңірлеріндегі жарық тапшылығын шешуге көмектеседі дейді. Бірақ Үндістан мен Бангладеш бұл өзеннің төменгі жағында тұратын миллиондаған адамға әсер етуі мүмкін деп алаңдаулы. Экологтар да табиғатқа зиян келуі мүмкін екенін айтып жатыр.

Қытай үкіметі болса, бұл жоба табиғатқа көп зиян келтірмейді деп сендіреді. Электр станциясы толық іске 2030 жылдары қосылуы мүмкін.

Бұл жаңалық Қытайдың қор нарығында да қозғалыс тудырып, құрылыс және энергетика компанияларының акциялары бірден қымбаттап кетті.

Автор: Рахат Жора