Қырғызстанның Ош және Бішкек қалаларында 78 жекеменшік емхана жабылды

Қырғызстанның Денсаулық сақтау министрлігі Бішкек пен Ош қалаларында орналасқан 78 жекеменшік медициналық ұйымның қызметін уақытша тоқтатты. Бұл шешім мамыр–маусым айларында жүргізілген ауқымды тексеріс нәтижесінде қабылданды, деп хабарлады ведомствоның баспасөз қызметі.

Министрлік мәліметінше, 117-ден астам ұйым тексерілген. Оның ішінде 37 клиниканың мүлде лицензиясы болмаған, ал қалған 80 мекемеде лицензия болғанымен, заң талаптарына сәйкес келмейтін өрескел бұзушылықтар анықталған.

Тексеру барысында мынадай заңбұзушылықтар жиі кездескен:

• лицензиясыз немесе рұқсат етілмеген қызмет түрлері бойынша медициналық көмек көрсету;
• медицина қызметкерлерінің біліктілік сертификаттары мен профильді білімі болмауы;
• арнайы білімі жоқ адамдардың науқастарды емдеуге тартылуы;
• санитарлық нормалардың бұзылуы және құралдарды стерилизацияламау;
• дәрілік заттарды дұрыс сақтамау және бақылаудағы препараттарды заңсыз қолдану;
• негізсіз процедуралар тағайындау.

Министрлік тұрғындар мен шетел азаматтарын тек ресми лицензиясы бар медициналық ұйымдарға ғана жүгінуге шақырды. Ресми рұқсаттың бар не жоқ екенін Денсаулық сақтау министрлігінің сайтынан тексеруге болады.

Құқық бұзушылықтар бойынша әкімшілік шаралар қолданылып, салынған айыппұлдың жалпы сомасы 4,5 млн сомнан асты. Заңсыз медициналық қызмет көрсету фактілері бойынша 37 іс құқық қорғау органдарына жіберілді.

Министрлік атап өткендей, лицензиясыз емханаларға бару – адам өмірі мен денсаулығына елеулі қауіп төндіреді. Науқастардың арасында сапасыз қызмет салдарынан қателескен екпелер, инфекциялық асқынулар, түрлі медициналық қателіктер тіркеліп отыр.