Қырғызстанда Қамшыбек Ташиевтің ісі құпияланды

Қырғызстанда бұрынғы Ұлттық қауіпсіздік мемлекеттік комитеті басшысы Камшыбек Ташиевке қатысты қылмыстық іс құпияланып, сотқа жолданды. Бұл туралы жергілікті БАҚ адвокаттың мәліметіне сілтеме жасап хабарлады.

Қорғаушы Икрамидин Айткуловтың айтуынша, 12 мамырда елдің Бас прокуратурасы айыптау актісін бекіткен. Ташиевке билікті күшпен басып алуға дайындалу және қызметтік өкілеттігін асыра пайдалану баптары бойынша айып тағылған.

Іс Бішкектегі Бірінші Май аудандық сотына қарауға жіберілген. Ташиевтен бөлек, тағы жеті адам айыпталушы ретінде өтіп жатыр.

Адвокаттың сөзінше, іс құпияланғандықтан, сот отырыстары жабық форматта өтеді. Тергеу мен сотқа қатысты мәліметтерді жариялауға тыйым салынған.

Бұған дейін Ташиев өзіне тағылған айыптарды мойындамайтынын және заң аясында қорғанатынын мәлімдеген.

Еске салайық, 10 ақпанда Садыр Жапаров Камшыбек Ташиевті вице-премьер және ҰҚМК төрағасы қызметтерінен босатқан еді.