Қырғызстан азаматтарының АҚШ-қа кіруіне тыйым салынуы мүмкін

АҚШ билігі 36 елдің азаматтарына виза шектеулерін енгізуді қарастырып жатыр. Арасында Қырғызстан да бар. Бұл туралы The Washington Post басылымы хабарлады.

Құжатқа сәйкес, жаңа шектеу шаралары аясында елдерге 60 күн ішінде АҚШ ұсынған талаптарды орындау бойынша алғашқы жоспар ұсыну міндеттелген. Меморандумға АҚШ Мемлекеттік хатшысы Марко Рубио қол қойған.

АҚШ әкімшілігінің бағалауынша, аталған елдер бірқатар талаптарды орындаудан қалып отыр. Атап айтқанда, кейбір елдерде азаматтарға сенімді жеке куәлік немесе азаматтық құжаттар беретін құзырлы әрі тиімді жұмыс істейтін мемлекеттік орган жоқ. Сонымен қатар, жалпылама үкіметтік жемқорлық жайлағаны, кейбір елдерден АҚШ-қа барған азаматтардың едәуір бөлігі визалық мерзімі аяқталғаннан кейін елде заңсыз қалып қойғаны да атап өтілген.

Құжатта шектеу енгізілуі мүмкін елдер қатарында Қырғызстанмен бірге Египет, Джибути, Гана, Нигерия, Камбоджа, Эфиопия, Тувалу, Сирия, Либерия сынды мемлекеттер бар.

АҚШ-тағы Қырғыз Республикасының азаматтары үшін мұндай шектеулер енгізілуі мүмкін деген ақпаратқа байланысты Қырғыз Республикасының Сыртқы істер министрлігі АҚШ-тың Бішкектегі елшілігінің консулын ресми түсініктеме беруге шақырды.

– Қазіргі кезде АҚШ-та қауіпсіздікті қамтамасыз етуге және шетел азаматтарының кіруін реттеуге бағытталған миграциялық заңнаманы қайта қарау жүріп жатыр. Қырғызстан азаматтарына қатысты қандай да бір ресми шектеу туралы әзірге нақты ақпарат түскен жоқ. Сонымен бірге, бұл тізім қандай критерийлерге негізделіп құрылғаны белгісіз күйінде қалып отыр, – деп мәлімдеді ведомство.