Қой сияқты қырып тастады: Нигерияда қарақшылар 38 тұтқынды өлтірді

2025 жылдың шілде айында Нигерияның солтүстік-батысындағы Замфара штатында қылмыстық топ 38 тұтқынды өлтірді. Қарулы қылмыстық топтар айдың басында ауыл тұрғындарын ұрлап әкетіп, әр тұтқын үшін 1 миллион найра (шамамен 655 АҚШ доллары) талап еткен. Отбасылар бар күшін салып, бұл соманы жинап берген. Алайда, төлем жасалғанына қарамастан, тұтқындар аман қалмады.

«Балаларымызды қой сияқты қырып тастады»

Қылмыскерлер 56 адамды Банга ауылынан (Каура Намода аймағы) ұрлап кеткен. Алғашқы келіссөздерден кейін олар талап еткен соманы алған. Содан кейін тек 18 адам – 17 әйел мен бір жас баланы босатқан. Бірақ қалған тұтқындардың тағдыры қайғылы аяқталды: 38 адамды, негізінен жастарды қарақшылар атып өлтірген.

«Олар біздің балаларымызды қой сияқты қырды. Ақылсыз әрі жүрексіз адамдар. Өз бауырларын өлтіріп жатқандарын ұмытады. Ақыр соңында бәріміз Алланың алдында жүздесеміз», – деді Каура Намода аймағының әкімшілік басшысы Манниру Хайдара Каура.

18 адам ғана аман қалды

Босатылған 18 адамның 16-сы ауруханада ем қабылдап жатыр. Қаза тапқандардың денесі туыстарына қайтарылмай қалуы мүмкін, себебі мұндай жағдайларда мәйіттер сирек беріледі. Куәгерлердің айтуынша, кей мүрделер далада екі күн бойы жатқан.

Қылмыстық топтармен күрес әлсіз күйінде қалып отыр

Нигерияның солтүстік-батысында қарулы қылмыстық топтар халық арасында “қарақшылар” деп аталады соңғы жылдары адам ұрлау, тонау және ауылдарды өртеп жіберу сияқты әрекеттермен жиі көзге түсіп жүр. Замфара, Кадуна, Кацин секілді штаттарда мұндай қылмыстар күнделікті жағдайға айналған.

2022 жылы Нигерия билігі бұл қылмыстармен күресу мақсатында арнайы заң қабылдады. Ол бойынша кепілдік үшін ақша төлеу – 15 жылдан басталатын түрме жазасына әкелетін қылмыс деп саналады. Егер тұтқын қаза тапса, адам ұрлау ісі үшін өлім жазасы қарастырылған. Алайда осы күнге дейін бұл заң бойынша ешкім жауапқа тартылмаған.

Автор: Әмір Жәнібек