Израиль Сирияны атқылады: Бес адам қаза тапты

Израиль әскері сәрсенбі күні Сирия астанасы Дамаскіке жойқын әуе соққыларын жасады. Reuters агенттігінің мәліметінше, зымырандар президент сарайының маңында орналасқан Сирияның Қорғаныс министрлігі ғимаратын жартылай қиратқан. Бес қауіпсіздік қызметкері қаза тапты.

Израиль тарапы Сирияның жаңа билігін «жасырынып жүрген жиһадшылар» деп атап, олардың елдің оңтүстігіне әскер кіргізуіне жол бермейтінін мәлімдеді. Сондай-ақ Израиль бұл өңірдегі друз қауымын қорғауға уәде берді.

Осыған байланысты АҚШ мемлекеттік хатшысы Марк Рубио мәлімдеме жасап, Вашингтон Сириядағы қақтығыстарға қатысы бар барлық тараптармен байланыс орнатып, жағдайды тұрақтандыру үшін нақты келісімдерге келгенін жеткізді.

– Бүгін кешке бұл алаңдатарлық әрі үрейлі жағдайдың нүктесі қойылады деп үміттенеміз, – деді Рубио.

Ал БҰҰ Қауіпсіздік кеңесі бейсенбі күні Сириядағы шиеленісті арнайы жиында қарамақ.

Айта кетейік, дүйсенбі күні Сирия үкіметі Эс-Сувейда аймағына әскер жіберген болатын. Бұл өңірде друз жасақтары мен бедуин қарулы топтары арасында қақтығыс болып, кейін үкімет әскері друздармен қақтығысып қалды. Жанжал салдарынан ондаған адам қаза тапқан.

Сириялық адам құқықтарын қорғау орталығының хабарлауынша, бір апта ішінде қаза тапқандар саны 169 адамға жеткен. Ал қауіпсіздік күштерінің дерегі бойынша, бұл көрсеткіш 300 адамға жуық.

Друздар — исламнан тараған жеке діни ағымды ұстанатын этникалық және діни қауым. Сирияның оңтүстігінде көптеп шоғырланған.