Францияда үйлер бір еуродан сатылып жатыр

Амбер – жан-жағын орман қоршаған, өзен жағасындағы әсем, шағын қала. Францияның оңтүстік-шығысында орналасқан бұл елдімекенде шамамен 6500 адам тұрады. Соңғы 20 жылда қаладан кемінде мың адам кеткен. Жергілікті билік тұрғындардың азаюына алаңдаулы.

Қала билігі жылжымайтын мүлік бағасын төмендету арқылы тұрғындарды тартқысы келеді. Қазір мұнда екі үй бір еуроға сатылып жатыр.

Ал енді басты сұрақ: мұнда қандай гәп бар?

1. Үйді сатып алғаннан кейін жаңа қожайын оны арнайы ережелерге сай жөндеуге міндетті. Бұл шығындарға жәрдемақы (субсидия) қарастырылған.

2. Үйді жөндеп алып, бірден жалға беруге болмайды. Жаңа қожайын үйді жөндегеннен кейін кемінде үш жыл Амберде тұруы керек.

3. Бұл үйді демалысқа арналған баспана ретінде пайдалануға болмайды. Үй иесінің негізгі тіркеуі (пропискасы) Амберде болуы тиіс.

4. Сонымен қатар бір еуроға үй сатып алғысы келген үміткерлер жөндеу жұмыстарының нақты жоспарын, сондай-ақ аяқталу мерзімін көрсетуі керек.

Барлық талап қаланың ресми сайтында жарияланған.