Еуроодақ қауіпті тауарларды сатқаны үшін Temu-ға 200 млн еуро айыппұл салды

Еуропалық одақ тұтынушылар қауіпсіздігін қамтамасыз етпегені және платформада заңсыз өнімдердің таралуына жол бергені үшін қытайлық Temu интернет-маркетплейсіне 200 миллион еуро көлемінде айыппұл салды. Бұл туралы BBC ақпараттық қызметі хабарлады.

Еуропалық реттеуші органдар жүргізген зерттеу қорытындысы бойынша, Temu компаниясы өз платформасындағы жүйелік тәуекелдерді талдау және бағалау міндеттемелерін тиісті деңгейде орындамаған. Тәуелсіз сараптамалық тексерістер барысында аталған маркетплейс арқылы электр қауіпсіздігі стандарттарына сай келмейтін қуаттағыш құрылғылар мен құрамында химиялық заттардың мөлшері шектен тыс көп балалар ойыншықтарының сатылғаны дәлелденді.

Енгізілген санкциялық шешімге сәйкес, Temu әкімшілігі айыппұл төлеумен қатар, ағымдағы жылдың 28 тамызына дейін анықталған заңбұзушылықтарды жою бойынша ресми іс-қимыл жоспарын ұсынуға міндеттелді.

Өз кезегінде Temu компаниясының басшылығы Еурокомиссияның бұл шешімімен келіспейтінін және тағайындалған айыппұл көлемін негізсіз деп есептейтінін мәлімдеді. Компания өкілдерінің уәжінше, тексеріс нәтижелері 2024 жылғы көрсеткіштерге негізделген және платформаның қазіргі қауіпсіздік жүйесінің ахуалын көрсетпейді. Қазіргі уақытта маркетплейстің құқықтық қызметі бұл шешімге қарсы апелляциялық шағым түсіру мүмкіндіктерін қарастыруда.

Ресми мәліметтерге сәйкес, бұл аталған брендке қатысты алғашқы сот дауы емес. Мұның алдында, 2025 жылы АҚШ-та тұтынушылардың жеке деректерін заңсыз тарату айыбы бойынша Temu платформасына қарсы ұжымдық талап-арыз берілген болатын. Айта кету керек, Қазақстан Республикасының нарығында Temu халықаралық интернет-платформалар арасында қосылған құн салығын (ҚҚС) ең көп төлейтін ірі субъектілердің бірі болып табылады.