Еуроодақ Азаттық радиосын қолдауға 5,5 млн еуро бөледі

Еуропалық Одақ «Азат Еуропа / Азаттық радиосының» (RFE/RL) қызметін қолдау мақсатында 5,5 миллион еуро көлемінде қаржылай көмек көрсететінін мәлімдеді. Бұл қаражат көршілес мемлекеттерде, соның ішінде Кавказ бен Орталық Азияда тәуелсіз ақпарат тарату қызметіне бағытталады. Бұл туралы 20 мамыр күні Еуроодақтың сыртқы істер жөніндегі жоғарғы өкілі Кая Каллас хабарлады.

— Фейк ақпараттар мен сүзгісіз контент көбейген заманда тәуелсіз журналистиканың рөлі бұрынғыдан да маңызды. Сондықтан біз «Азат Еуропа / Азаттық радиосының» жұмысын қолдау үшін Еуропалық демократия қоры арқылы 5,5 млн еуро көлемінде төтенше қысқа мерзімді қаржыландыру келісімшартын әзірлеп жатырмыз, — деді Каллас.

Оның айтуынша, бұл – толыққанды ұзақ мерзімді шешім емес. Алайда ЕО тәуелсіз ақпарат құралдарын қолдауды стратегиялық басымдық ретінде қарастырады. Каллас Еуроодақ көрші елдерде, әсіресе сыртқы ақпаратқа тәуелді аймақтарда (Кавказ, Орталық Азия) Azattyq радиосының қызметін қолдауға басымдық беретінін атап өтті.

Бұған дейін Швеция үкіметі 1,84 млн еуро (20 млн швед кроны) көлемінде қаржылай көмек көрсеткен болатын.

АҚШ-тағы қаржыландыру дағдарысы

RFE/RL – халықаралық медиакорпорация, 1953 жылдан бері жұмыс істейді. Қазіргі таңда ол 27 тілде, 23 елде ақпарат таратады. Ұйымның негізгі қаржыландыру көзі – АҚШ Конгресі арқылы бөлінетін қаражат. Алайда 2025 жылдың 15 наурызында АҚШ-тың Ғаламдық медиа агенттігі (USAGM) RFE/RL-ге бөлінген қаржыны қайтарып алған. Осы шешім салдарынан 122 қызметкер жұмыстан шығарылып, көптеген келісімшарт бұзылған.

Кейін бұл шешім өзгертілді. 30 сәуірде АҚШ соты RFE/RL корпорациясына Конгресс мақұлдаған 12 млн долларды беруді міндеттейтін уақытша бұйрық шығарды. Жоспар бойынша, қазан айына дейін «Азат Еуропа / Азаттық радиосы» АҚШ үкіметінен тағы 77 млн доллар көлемінде қаражат алуы тиіс.

RFE/RL өз жұмысын тоқтатпаған. Ұйым өзін биліктен тәуелсіз медиа ретінде сақтап отыр.