Дания дипфейкпен күресте адамның түрі мен дауысын зияткерлік меншік ретінде танымақ

Дания билігі жасанды интеллект көмегімен жасалатын дипфейктерге (яғни адамның түр-әлпеті, дауысы немесе қимыл-қозғалысы негізінде жасалған жалған фото, аудио немесе видео) қарсы күресте түбегейлі қадамға бармақ. Бұл туралы The Guardian басылымы хабарлады.

Ел үкіметі азаматтың бет-бейнесі, дауысы және мінез-құлқын оның жеке зияткерлік меншігі ретінде тануды ұсынды. Яғни, егер адамның цифрлық көшірмесі – оның түрі, дауысы немесе жүріс-тұрысы жасанды нейрожелілер арқылы жасалып, интернетке рұқсатсыз жүктелсе, онда материал авторы оны жоюға міндетті болады. Сонымен қатар жәбірленуші өзіне өтемақы талап ете алады.

Алайда бұл заң әзілдер мен пародияларға қолданылмайды, яғни сатира мен еркін шығармашылыққа шектеу қойылмайды.

Бастама Дания парламентінде бірауыздан дерлік қолдау тапты. Заң жобасын ресми түрде 2025 жылдың күзіне қарай парламентке енгізу жоспарланып отыр.

Дат билігі онлайн-платформаларға жаңа ережелерді елемеуге болмайтынын ескертті. Құқық бұзушыларға ірі айыппұлдар салынады. Ал заң бұзушылықтар жалғасса, іс Еурокомиссия деңгейіне дейін көтерілуі мүмкін.

Копенгаген бұл заңды Еуропаның басқа елдеріне үлгі болады деп үміттеніп отыр.