Австралия 16 жасқа дейінгі балаларға YouTube қолдануға тыйым салмақ

Австралия үкіметі 16 жасқа толмаған жеткіншектердің YouTube видеохостингінде аккаунт ашуына тыйым салу туралы шешім қабылдады. Бұл туралы елдің премьер-министрі Энтони Альбанезе мәлімдеді.

Мәліметке сәйкес, аталған шектеу 2025 жылдың желтоқсанында күшіне енеді. Бұл – елдің интернеттегі қауіпсіздік жөніндегі уәкілі ұсынған заң жобасының бір бөлігі. Жаңа ереже YouTube-пен қатар, Facebook, Instagram, Snapchat, TikTok және X әлеуметтік желілеріне де қатысты болмақ. Алайда онлайн ойындар, мессенджерлер мен білім беру платформалары бұл тізімге кірмейді.

Альбанезе бұл мәселені қыркүйекте өтетін БҰҰ Бас Ассамблеясының 80-сессиясында халықаралық әріптестерімен талқылауға ниетті екенін айтты.

Reuters агенттігінің жазуынша, Австралиядағы кәмелетке толмағандардың 37%-ы YouTube желісінде зиянды контентке тап болған. Бұл көрсеткіш өзге әлеуметтік желілермен салыстырғанда ең жоғары. Сондай-ақ, видеохостингті 13–15 жас аралығындағы жасөспірімдердің шамамен 75%-ы қолданатыны белгілі.