Астронавтар айдың арғы беті қандай екенін көрсетті

«Артемида-2» миссиясының астронавтары Жерден бұрын-соңды болмаған қашықтыққа ұшып, Айдың арғы бетіне өтті. Бұл туралы BBC-дің орыс қызметі хабарлады.

NASA мәліметінше, экипаж Жерден 406 771 шақырым қашықтыққа дейін алыстап, 1970 жылы «Аполлон-13» миссиясы орнатқан рекордты жаңартты. Бұған дейінгі ең жоғары көрсеткіш 400 171 шақырым болған.

«Орион» ғарыш кемесі Айдың арғы бетінде шамамен 40 минут болып, оның бетіне дейінгі ең жақын қашықтық 6 550 шақырымды құрады. Осы уақыт ішінде астронавтар Ай бетінің суреттерін түсіріп, кратерлер мен жыныстарды зерттеген.

Жиналған деректер мен бейнематериалдар Айдың геологиялық құрылымын тереңірек түсінуге және оның карталарын нақтылауға мүмкіндік береді. Әсіресе ғалымдар мұз болуы мүмкін полярлық аймақтарға ерекше назар аударып отыр.

Сондай-ақ мамандар Ай бетінде күн сәулесі мен электростатикалық күштердің әсерінен қозғалған шаң бөлшектерін зерттеуді жоспарлап отыр. Бұл болашақ миссияларды жоспарлау кезінде қауіпсіз аймақтарды анықтауға көмектеседі.

Қазіргі уақытта «Артемида-2» миссиясының экипажы Жерге қайтып келе жатыр.