Анталияда велосипедпен келе жатқан қазақстандық жігіт мерт болды

Түркияның танымал курортты өңірі Анталияда тағы да қайғылы жол апаты тіркелді.

Оқиға Белек курорттық ауданында, Барыш көшесінде, түн ортасында болған.

Жергілікті басылымдардың хабарлауынша, 27 жастағы қазақстандық азамат Қуат Аманбеков, Серик ауданындағы бес жұлдызды қонақүйде бармен болып істеген. Сол түні ол жұмыстан кейін үйіне велосипедпен қайтып бара жатқан. Осы сәтте 07 T 2557 нөмірлі коммерциялық такси көлігі оның үстіне соғылған. Таксидің тізгінінде 43 жастағы түрік жүргізушісі болған.

Куәгерлердің айтуынша, соққыдан кейін Аманбеков бірнеше метрге ұшып кеткен. Оқиға орнына жедел жәрдем мен полиция шақырылғанымен, дәрігерлер оның өмірін сақтап қала алмады — жігіт сол мезетте қаза тапқан.

Полиция оқиға орнын дереу қоршап, жолды уақытша жапқан. Марқұмның денесі Серик мемлекеттік ауруханасының мәйітханасына жеткізілді. Такси жүргізушісі ұсталып, полицей бөлімшесіне жеткізілді. Ол қазір тергеу амалдарына қатысып жатыр.

Қазіргі кезде түрік құқық қорғау органдары оқиғаның мән-жайын анықтап жатыр. Сарапшылар таксидің жоғары жылдамдықпен жүрген-жүрмегенін, сондай-ақ жол ережесінің бұзылу фактілерін тексеруде.

Белгілі болғандай, Қуат Аманбеков бірнеше жылдан бері Түркияда еңбек етіп жүрген. Әріптестері оны еңбекқор, ашық-жарқын, өз ісін сүйетін маман ретінде сипаттайды. Қазақстанның Түркиядағы консулдығы марқұмның туыстарымен байланысып, қажетті заңдық және ұйымдастырушылық көмек көрсетіп жатыр.