АҚШ-тың Сан-Диего қаласындағы ислам орталығында болған атыс салдарынан бес адам қаза тапты

АҚШ-тың Калифорния штаты, Сан-Диего қаласындағы Ислам орталығында қарулы шабуыл болып, бес адам көз жұмды. Қаза тапқандардың арасында шабуыл жасаған екі жасөспірім бар. Оқиғаның егжей-тегжейін Fox News телеарнасы полиция департаментінің ресми мәліметтеріне сілтеме жасап таратты.

Құқық қорғау органдарының ақпараты бойынша, күдіктілердің жасы 17-де және 19-да болған. Сан-Диего полициясының бастығы Скотт Валь баспасөз брифингінде мәлімдегендей, екі жасөспірім шабуылдан кейін оқиға орнынан алыс емес жерде тоқтатылған автокөліктің ішінен өлі күйінде табылған. Тергеудің алдын ала нұсқасы бойынша, күдіктілер өз-өзіне қол жұмсаған. Арнайы операция барысында полиция қызметкерлері тарапынан қару қолданылмағаны нақтыланды.

Ықтимал діни өшпенділік негізінде жасалған бұл қылмыс салдарынан ислам орталығының үш мүшесі (ересек адамдар) қаза тапты. Олардың бірі — мешіт күзетшісі. Полиция басшысының сөзіне қарағанда, күзетші уақытылы әрекет етіп, шабуылдаушылардың ғимарат ішіне тереңдеп кіруіне бөгет жасаған. Осылайша ол іште болған өзге жамағат пен балалар арасында құрбандар санының артуына жол бермеді.

Қазіргі уақытта оқиға орын алған аудан толықтай қоршауға алынып, Федералды тергеу бюросы (ФТБ) мен жергілікті детективтер бірлескен іздестіру-тергеу амалдарын жүргізіп жатыр. Құрбандардың аты-жөні тергеу мүддесіне байланысты әлі жарияланған жоқ.