АҚШ-тың барлау қызметі Иранның ядролық қару жасап жатқанын дәлелдейтін дерек таппады

АҚШ Сенатының барлау жөніндегі арнайы комитеті төрағасының орынбасары Марк Уорнер 18 маусымда MSNBC телеарнасына берген сұхбатында Иранның ядролық қару жасаумен айналысып жатқанына дәлел жоқ екенін айтты. Ол бұл туралы Ұлттық барлау қызметі сенаторларға екі күн бұрын ұсынған мәліметтерге сүйене отырып жеткізді.

Уорнердің айтуынша, 25 наурызда Ұлттық барлау директоры Тулси Габбард арнайы комитетке жолдаған ресми мәлімдемесінде «Иран бомба жасауға бағытталған ешқандай әрекет жасаған жоқ» деп атап өткен.

Осы мәлімдемелерге қарамастан, АҚШ президенті Дональд Трамп сол күні журналистерге Иранның «ядролық қаруға қол жеткізуге жақын болғанын мәлімдеді.

ABC және The Wall Street Journal деректеріне сүйенсек, Трамп әкімшілігі Иранға соққы жасау жоспарын алдын ала мақұлдаған, бірақ кейін бұл шешімінен бас тартып, Тегеранмен келіссөз жүргізу мүмкіндігін ашық қалдырған. Иран билігі болса, ядролық қаруға ұмтылу туралы барлық айыптауларды жоққа шығарып отыр.

Бұған қоса, Халықаралық атом энергиясы агенттігінің (МАГАТЭ) бас директоры Рафаэль Гросси 18 маусымда Sky News телеарнасына берген сұхбатында Иранның ядролық қару жасауға жүйелі түрде ұмтылып жатқанын дәлелдейтін мәлімет жоқ екенін растады. Оның айтуынша, Иран уранды 60%-ға дейін байытып отыр, бұл – әлемде теңдесі жоқ көрсеткіш. Бірақ МАГАТЭ «Иран қару жасап жатыр» деп мәлімдемеген.

Сондай-ақ агенттік Израильдің Ирандағы ядролық нысандарға жасаған шабуылдарына алаңдаушылық білдіріп отыр. Бұл шабуылдар радиологиялық зардаптарға, яғни ядролық бөлшектердің атмосфераға таралуына әкелуі мүмкін.