АҚШ-тың барлау қызметі Иранның ең қорғалған ядролық нысаны жойылғанын растамады

АҚШ пен Иран арасындағы әскери қақтығыс аясында Иранның ядролық объектілеріне жасалған шабуыл нәтижесі туралы түрлі пікірлер айтылып жатыр. CNN мен The New York Times дерегінше, Пентагон Иранның ядролық бағдарламасы біржола жойылмады деп есептейді.

АҚШ-тың әскери барлау қызметінің есебіне сәйкес, Фордо, Натанз және Исфахандағы ядролық нысандарға бағытталған соққылар Тегеранның ядролық бағдарламасын тек бірнеше айға кейінге шегерген. Себебі Иран шабуылға дейін байытылған уран қорларын алып кетіп, негізгі центрифугаларды аман сақтап қалған.

Bloomberg агенттігі де спутниктік суреттер мен МАГАТЭ өкілдерінің мәліметтеріне сүйене отырып, соққылар реакторларға бағытталмағанын, мақсатты түрде тек жерүсті ғимараттар жойылғанын хабарлады. Исфахандағы үш реактордың дін аман қалуы және радиациялық деңгейдің өзгермеуі де осыны растайды.

🔻 Ақ үйдің реакциясы

АҚШ президенті Дональд Трамп бұл мәліметтерге қарсы шығып, ақпарат құралдарын "жеңілгендер" мен "қоқыс" деп атап, әскери әуе күштерінің шабуылы толық жетістікке жеткенін мәлімдеді. Ақ үй баспасөз хатшысы Кэролайн Ливитт те бұл скептицизмді "президентті төмендету әрекеті" деп атады.

Иран тарапы да шабуылдың ядролық бағдарламаның жалғасуына кедергі келтірмегенін мәлім етті.

🛑 Израиль–Иран соғысы

2025 жылғы 13 маусымға қараған түні Израиль Иранға қарсы әскери операция бастаған. Бұл шабуылдар Тегеранның ядролық қару жасау қаупімен түсіндірілді. Иран бұл айыптауларды жоққа шығарып, жауап ретінде жүздеген дрон мен баллистикалық зымыран ұшырды.

22 маусымға қараған түні АҚШ қақтығысқа араласып, Ирандағы үш ядролық нысанға соққы жасады. Фордо зауытына 13,6 тонна болатын бомбалар тасталып, Натанз бен Исфахандағы нысандар "Томагавк" зымырандарымен атқыланды.

24 маусымда тараптар атысты тоқтату туралы уағдаласты. Алайда Израиль Иранның келісімді бұзып, зымыран ұшырғанын айтып, қатаң жауап беретінін ескертті.