АҚШ-та да уақыт ауыстыру мәселесі көтеріліп, одан біржола бас тарту туралы заң жобасы Конгреске жолданды

АҚШ Өкілдер палатасының Энергетика және сауда жөніндегі комитеті ел аумағында жазғы уақытты тұрақты етіп бекітуді көздейтін «Sunshine Protection Act» заң жобасын мақұлдады, деп хабарлайды Reuters. Комитеттегі дауыс беру барысында құжатты 48 мүше қолдап, тек біреуі қарсылық білдірді.

Егер бұл бастама заңнамалық тұрғыдан толық қолдау тапса, америкалықтардың жылына екі рет сағат тілін ауыстыру тәжірибесі тоқтатылады. Заң жобасын әзірлеушілердің уәжінше, уақыт белдеуін жиі өзгерту азаматтардың ұйқы режимін бұзады, өндірістік жарақаттану қаупін арттырады және жол-көлік оқиғаларының көбеюіне себеп болады. Сонымен қатар, қыс мезгілінде күн сәулесі белсенділігінің ұзаруы халықтың сауда орындары мен қызмет көрсету саласына жүгіну уақытын арттырып, шағын және орта бизнеске оң ықпал етпек.

Билік өкілдерінің ұстанымдары мен қайшылықтары

АҚШ Президенті Дональд Трамп бұл заң жобасына қолдау білдірді. Ол өзінің Truth Social әлеуметтік желісіндегі парақшасында мәлімдеме жасап, уақытты жылына екі рет ауыстыруды тиімсіз процедура деп атап, бұл процеске уақыт пен қаржы шығындауды тоқтату қажеттігін атап өтті.

Алайда құжаттың Конгрессте мақұлдануына қарсы уәж айтушылар да бар. Сенатор-республикашыл Том Коттонның пікірінше, жазғы уақытты жыл бойы қалдыру қыс айларында таңның кеш атуына әкеп соғады. Бұл жағдайда бірқатар штаттарда мектеп оқушыларының таңертеңгі уақытта оқу орындарына қараңғыда баруына тура келеді, бұл қауіпсіздік мәселесін туындатуы мүмкін. Айта кету керек, заң жобасында жекелеген штаттардың бұл жүйеге көшуден бас тарту құқығы сақталған.

Мәселенің тарихи негізі

АҚШ-та жазғы уақыт жүйесі өткен ғасырдың 1960-шы жылдарынан бастап тұрақты қолданылып келеді. Оған дейін, Екінші дүниежүзілік соғыс кезеңінде және 1974 жылғы энергетикалық дағдарыс тұсында үнемдеу мақсатында жыл бойғы тұрақты режим енгізілген болатын. Алайда 1974 жылғы реформа қоғам тарапынан қолдау таппай, сол жылдың ішінде қайта жойылды.

Бұған дейін, 2022 жылдың наурыз айында АҚШ Сенаты бұл заң жобасын бірауыздан мақұлдаған еді, бірақ ол уақытта Өкілдер палатасы құжатты жалпы дауыс беруге шығармаған болатын. Қазіргі уақытта заң жобасы Өкілдер палатасы мен Сенаттың қарауына жолдану сатысында тұр.