АҚШ пен Қытай сауда келісіміне қол қойды – Трамп

АҚШ Президенті Дональд Трамп Қытаймен сауда келісіміне қол қойылғанын мәлімдеді. Оның айтуынша, құжатқа «кеше ғана» қол қойылған және ол америкалық бизнес үшін Қытай нарығын ашуды мақсат етеді. Алайда президент келісімнің нақты мазмұны жөнінде толық мәлімет бермеді. Сондай-ақ ол жақын арада Үндістанмен де осындай келісімге қол жеткізуді жоспарлап отырғанын айтты.

АҚШ-тың сауда министрі Говард Лютник Bloomberg агенттігіне берген сұхбатында Вашингтон мен Бейжіңнің мамырда Женевада келісілген мәміленің ресми рәсімделуін аяқтағанын хабарлады.

«Олар бізге сирек кездесетін жер элементтерін жеткізеді. Ал бұл жүзеге асқаннан кейін біз өз тарапымыздан енгізілген қарсы шараларды алып тастаймыз», – деді Лютник.

Қытай Сауда министрлігі 27 маусым күні таратқан мәлімдемесінде сирек кездесетін металдар нақты аталмағанымен, тараптар келісімнің егжей-тегжейін нақтылау бойынша алға жылжығанын растады. Онда Қытай заңға сәйкес келетін экспорттық өтінімдерді мақұлдайтыны, ал АҚШ Қытайға қарсы енгізілген кейбір шектеулерді алып тастайтыны айтылған.

Айта кетейік, бұған дейін Қытай билігі сирек кездесетін металдарды экспорттауға рұқсат беру процесін жеделдеткен болатын. Бұл металдар – жоғары технологиялық өнімдерді өндіру үшін аса қажет шикізат. Қытайдың АҚШ-қа бұл ресурстарды экспорттауды уақытша тоқтатуы екі ел арасындағы басты қайшылықтардың бірі болған еді.

Ақ үйге 2025 жылдың ақпанында қайта оралғаннан кейін Дональд Трамп Қытаймен сауда соғысын бастады. Екі алпауыт экономика бірнеше мәрте өзара кедендік тарифтерді көтеріп, бұл әлемдік нарықтағы тұрақсыздыққа әкелді. Сәуір айында Трамп Қытайдан келетін тауарларға салынатын импорттық баж салығын 145%-ға дейін көтерді. Қытайдың қарсы баждары жалпы 125%-ға жетті.

Мамырда Женевада өткен келіссөздерде тараптар келіспеушіліктерді реттеу бойынша «елеулі ілгерілеуге» қол жеткізгенін мәлімдеді. Маусым айының басында Лондонда екі күндік қосымша консультациялар өтті. Осыдан кейін Трамп Қытайдың АҚШ-қа сирек кездесетін металдар мен магниттерді жеткізетіні жөнінде келісім жасалғанын жариялады.

«Біз жалпы 55% тарифпен келістік, Қытай 10% алды. Қарым-қатынасымыз тамаша!» – деп жазды АҚШ президенті өз парақшасында Truth Social желісінде.