АҚШ Иранның жүк кемесін басып алды

АҚШ әскері блокаданы бұзуға тырысқан Иранның жүк кемесін қолға түсіргенін мәлімдеді, деп хабарлады Reuters. 

АҚШ әскери өкілдерінің мәліметінше, иран туымен жүрген кеме Бандар-Аббас портына бағыт алған кезде атқылауға ұшырап, кейін бақылауға алынған. Вашингтон бұл әрекетті блокаданы қамтамасыз ету шарасымен байланыстырды.

Иран тарапы кеменің Қытайдан шыққанын айтып, АҚШ әрекетін «қарулы қарақшылық» деп бағалады. Сонымен қатар Тегеран жақын арада жауап қайтарылатынын мәлімдеді.

Иран билігі сондай-ақ АҚШ-пен жоспарланған келіссөздердің келесі кезеңіне қатысудан бас тартқан. Бұл шешім блокада, Вашингтонның ұстанымы мен талаптарына байланысты қабылданғаны айтылды.

Иранның бірінші вице-президенті Мохаммадреза Ареф мұнай экспорты шектелсе, өзге елдерге қауіпсіздік тегін қамтамасыз етілмейтінін мәлімдеді.

Алдағы уақытта АҚШ делегациясының Пәкістанға баруы жоспарланған. Бұған дейін тараптар ядролық бағдарлама мен Ормуз бұғазы мәселелері бойынша ортақ шешімге келе алмаған.