АҚШ Иранға ядролық соққы беру мүмкіндігін жоққа шығармады

АҚШ билігі Иранның Фордо қаласындағы уран байыту зауытына тактикалық ядролық қару қолдану нұсқасын қарастырып жатыр. Бұл туралы 19 маусым күні Fox News телеарнасының тілшісі Джеки Хайнрик Ақ үй өкіліне сілтеме жасап хабарлады.

Дегенмен америкалық әскерилер Фордо нысанын жою үшін ядролық қаруды қолданбай-ақ, қуатты жерасты бомбалары жеткілікті болады деп есептейді. Осылайша, Трамп әкімшілігі The Guardian басылымы жариялаған ақпаратты жоққа шығарды. Онда әскери шенеуніктер тек ядролық соққы ғана бұл нысанды жоя алады деп есептейтінін, бірақ Трамп бұл қадамға баруға дайын емес екені айтылған болатын.

Axios порталының жазуынша, Трамп GBU-57 маркалы жойқын бомбаның 90 метр тереңдікте орналасқан ядролық зауытты бұза алатынына сенімсіздік танытқан. АҚШ Қорғаныс министрлігіне қарасты Әскери қауіп-қатерді азайту агенттігі (DTRA) мұндай нысанды жою үшін алдымен әдеттегі бомбалармен топырақты жұмсартып, содан кейін ядролық снаряд тастау қажет екенін мәлімдеген.

The Wall Street Journal дерегінше, Трамп 17 маусым күні Иранға әскери соққы беру жоспарын мақұлдаған, бірақ оны іске асыру туралы шешімді кейінге қалдырған. Қазіргі таңда Ақ үй Тегеранның өз еркімен ядролық бағдарламадан бас тартуын күтіп отыр. Президент әкімшілігі алдағы екі апта ішінде нақты шешім қабылданатынын мәлімдеді.

Бұған дейін Дональд Трамп Ираннан толық капитуляцияны талап етіп, АҚШ Иранның әуе кеңістігін бақылауға алғанын және аятолла Хаменеи қайда жасырынғанын білетінін айтқан. Дегенмен ол Иранның рухани көшбасшысын өлтіру жоспары жоқ екенін жеткізді.

Оған жауап ретінде Хаменеи Иран ешқашан берілмейтінін, Вашингтонның ешқандай талабын орындамайтынын мәлімдеді.

«АҚШ шабуыл жасайтын болса, ол орны толмас салдарға алып келеді. Біз соғыс та, бітім де мәжбүрлі түрде жасалса, екеуіне де қарсылық білдіреміз. Иран ешқашан қысымға бас имейді», – деді Иранның жоғарғы басшысы.