АҚШ Иранға соққы жасаудан неге бас тартты: Трампқа кімдер ықпал етті?

АҚШ президенті Дональд Трамп Иранға қарсы 19 мамырға жоспарланған әскери шабуылды белгісіз мерзімге кейінге қалдырғанын мәлімдеді.

Мұндай шешімнің қабылдануына Таяу Шығыстағы бірнеше мемлекет басшыларының араласуы себеп болған. Трамптың сөзінше, оған Қатар, Сауд Арабиясы және Біріккен Араб Әмірліктерінің жетекшілері арнайы өтініш білдірген. Араб елдерінің басшылары қазіргі уақытта Тегеранмен жүріп жатқан «байсалды келіссөздердің» нәтижесін күте тұруды сұраған.

АҚШ президенті жасалатын жаңа мәміле Иранның ядролық қаруға ие болуына мүлдем жол бермеуге тиіс екенін қатаң ескертті. Ол Пентагон басшылығына шабуылды әзірге бастамай, уақыт бере тұруды тапсырған. Дегенмен, егер дипломатиялық келісім сәтсіз аяқталса, америкалық әскери күштер Иранға қарсы «кең ауқымды операцияны» дереу бастауға дайын отыруы қажет.

АҚШ пен Иран арасындағы уақытша бітім осы жылдың сәуір айынан бері күшінде тұрған болатын. Алайда мамыр айының басында тараптардың қайтадан бір-біріне соққы жасауы жағдайды ушықтырып жіберді. Екі ел арасындағы шиеленіс үстіміздегі жылдың ақпан айында АҚШ пен Израильдің Иран аумағына қарсы бірлескен әуе операциясын бастауынан кейін шегіне жеткен еді. Бұған жауап ретінде Тегеран билігі әлемдік мұнай тасымалы үшін стратегиялық маңызы бар Ормуз бұғазын жауып тастаған болатын.