Адамдар өз етінен стейк жасай ала ма?

Америкалық зерттеушілер мен ас дизайнерлері тобы көпшілікті таңғалдырған ерекше жобаны ұсынды. Ouroboros Steak деп аталатын бұл бастама адамның өз клеткасынан тағамдық өнім - стейк өсіруге болатынын көрсетуді мақсат етеді. 

Авторы - биоинженер әрі суретші Эндрю Пеллинг бастаған команда болашақта жануарларды өлтірмей-ақ, жасушадан ет өндіру идеясына қоғамның назарын аударуды көздеді.

Бұл қалай жүзеге асады?

Адамның ішкі жағы, яғни ауыз қуысынан алынған жасушалар мен адам қанынан алынған сарысу арнайы қоректік ортаға салынады. Бұл биоматериалдар үш ай ішінде стейк тәрізді құрылымға айналады. Өнімнің мөлшері шағын, салмағы небәрі бірнеше грамм болады.

Бір қарағанда бұл идея қорқынышты көрінуі мүмкін. Алайда зерттеушілер мұны каннибализмге жатқызуға болмайтынын айтады. Себебі, мұнда адам өзіне зиян келтірмейді және жасуша алу процесі ауыртпалықсыз өтеді.

Жоба болашақ өнім үшін емес, тәжірибе үшін ғана

Ouroboros Steak ешбір елде тағам ретінде сатуға рұқсат етілмеген. Жоба тек көрмелер мен арт-инсталляциялар форматында ұсынылып жүр. Ғалымдар бұл жобаны болашақтың тамағы ретінде емес, бүгінгі қоғамның этикалық, ғылыми және тұтынушылық шекараларын сынға алу тәсілі ретінде қарастырады.

Aдам жасушасынан ет өндіру ғылыми фантастика емес, бірақ ол бүгінгі таңда коммерциялық өнім де емес. Ouroboros Steak - бұл қоғамды ойландыруға арналған эксперимент. Оның мақсаты - биотехнология мен этиканы, тамақ пен тұтыну мәдениетін қайта қарауға итермелеу.

Автор: Әмір Жәнібек