Астанада автобус жолақысы 150 теңгеге қымбаттауы мүмкін

Астанада қоғамдық көліктегі жолақы құны таяу арада өзгеруі мүмкін. Елорда әкімдігі 1 желтоқсаннан бастап қолма-қолсыз төлем жасағанда жолақыны 150 теңге деңгейінде белгілеуді ұсынып отыр. Егер бұл шешім қолдау тапса, жолақы құны бірден 40 теңгеге, яғни 36%-ға қымбаттамақ.

Бұл қадамға не себеп?

Әкімдіктің түсіндіруінше, тарифті өзгерту - уақыт талабы. Өйткені соңғы жылдары тасымалдаушылардың шығыны еселеп артқан:

• Жанар-жағармай бағасы: 2014 жылдан бері дизель отынының литрі 107 теңгеден 329 теңгеге дейін қымбаттады.

• Еңбекақы өсімі: Бұрын жүргізушілер 100–150 мың теңге маңайында жалақы алса, бүгінде автобус түрі мен жұмыс кестесіне байланысты олардың айлығы 700 мың теңгеден басталады.

• Автобустар мен қосалқы бөлшектер: Қосалқы бөлшектер мен жөндеу жұмыстарының құны өсті. Сонымен бірге соңғы үш жылдың өзінде қала үшін 1 127 жаңа автобус сатып алынған.

Сонымен қатар автобустар паркін әрі қарай жаңарту, бағдарлар желiсiн кеңейту және қоғамдық көліктің үздіксіз әрі қауіпсіз жұмысын қамтамасыз ету үшін де шығындарды қайта қарау қажеттілігі туындап отыр.

Жолақы артады дегеннің өзінде, қаладағы әлеуметтік жеңілдігі бар азаматтар үшін автобуста жүру бұрынғыша тегін болып қала береді. Олардың қатарында пенсионерлер, мүмкіндігі шектеулі жандар, көпбалалы отбасылар және Астанада білім алатын 18 жасқа дейінгі балалар бар.

Айта кету керек, жолақыны көтеру туралы шешім әлі толық бекітілген жоқ. Ол ресми түрде мақұлданған жағдайда ғана жаңа тариф бірінші желтоқсаннан бастап күшіне енеді.