Франциядағы төтенше жағдай: 3 мың адам қауіпсіз жерге көшірілді

Францияның оңтүстік және оңтүстік-батыс аймақтарында бір мезгілде тұтанған қуатты орман өрттері салдарынан қауіпті жағдай қалыптасты. Deutsche Welle хабарлауынша, табиғи апат аймақтарынан үш мыңға жуық тұрғын қауіпсіз жерге көшірілді.

Марсельдің солтүстігіндегі Роньяк және Лансон-Прованс коммуналары маңындағы тілсіз жау көлік қозғалысына кедергі келтіріп, Марсель, Бордо және Авиньон бағытындағы теміржол қатынасының бір бөлігін тоқтатуға мәжбүр етті.

Сондай-ақ, Окситания аймағындағы Пузоль-Минервуа коммунасы маңында 9 шаршы шақырым аумақты шарпыған ірі өрт тіркелді. Ондағы жұмыстарды күші секундына 70 метрге дейін жететін қатты жел қиындатып отыр. Прованс – Альпі – Лазур жағалауындағы Сент-Мари-ла-Мер коммунасында болған өрт салдарынан кемпингтер зардап шегіп, ондаған автофургон мен бунгало жанып кетті.

Жалпы Франция табиғатының жойқын күшіне екі мыңға жуық өрт сөндіруші тартылды. Ресми мәліметтерге сәйкес, тек 1 шілденің өзінде 12 шаршы шақырым жер күлге айналған. Ал маусым басталғалы бері елде шамамен жеті мың өрт оқиғасы тіркеліп, 87 шаршы шақырым орман алқабы жойылды.

Синоптиктер бұл жағдайды маусым айында 11 күнге созылған ұзақ ыстық толқынымен байланыстырып отыр. Ауа температурасы 40 градустан жоғары көтерілді. Météo-France метеоқызметі алдағы уақытта ауа райының одан әрі ыситынын болжап, билік өкілдері халықты барынша сақ болуға шақырды.