Еуропадағы аптап ыстық салдарынан 18 адам қаза тауып, Францияда екі бала қайтыс болды

Еуропаның көптеген аймағында тіркелген аномалиялық ыстық салдарынан адам шығыны орын алып, метеорологиялық бақылау тарихында жаңа температуралық рекордтар жаңартылды, деп хабарлайды Reuters.

Ресми мәліметтер бойынша, қазіргі аптап ыстықтан Еуропада кемінде 18 адам қайтыс болды. Францияның Карпантра қаласында екі және төрт жасар екі бала көлік ішінде ыстықтан тұншығып, көз жұмды. Сонымен қатар Бордо аймағында 80 мен 95 жас аралығындағы үш адам қайтыс болды.

Ыстық ауа райы кезінде су айдындарындағы қауіпсіздік мәселесі де өзекті болып тұр. Францияда екі күннің ішінде 13 адам суға батып кеткен. Азаматтық қауіпсіздік қызметі тұрғындарды тек арнайы жабдықталған және құтқарушылар бақылайтын орындарда ғана шомылуға шақырады.

Еуропа қалаларында термометр бағанасы бұрын-соңды болмаған деңгейге көтерілді:

Франция: Бордода ауа температурасы 41,9°C, Пуатье қаласында 41,2°C-қа жетті. Бұл - 1947 жылдан бергі ең жоғары көрсеткіш.

Испания: Сан-Себастьян қаласында ауа температурасы 40°C-қа жуықтады.

Италия: 12 қалада «қызыл» (ең қауіпті) деңгей жарияланды. Электр желілеріне түскен салмақтан энергия компаниялары қосымша генераторларды іске қосуға мәжбүр болды.

Ұлыбритания: Алдағы күндері маусым айындағы рекордтық көрсеткіш (39°C-тан жоғары) күтілуде.

Ғалымдардың айтуынша, бұл жағдай Сахара шөлінен келген ыстық ауа массасының Еуропа үстінде баяу қозғалуына («омега-блок» атмосфералық жүйесі) байланысты орын алған. Бұл аймақта желдің болмауына және ауа температурасының ұзақ уақыт бойы төмендемеуіне әкеліп соқты. Дүниежүзілік метеорологиялық ұйымның дерегінше, Еуропадағы ауа райының жылыну қарқыны әлем бойынша орташа көрсеткіштен екі есе жоғары.