Зеленский келіссөздер арқылы соғысты қысқа дейін аяқтау мүмкіндігі туралы мәлімдеді

Украина Президенті Владимир Зеленский 31 мамырда эфирге шыққан CBS News телеарнасына берген сұхбатында Украина қарулы күштерінің Үшінші армиялық корпусының командирі Андрей Билецкийдің уәжімен келісетінін мәлімдеді. Билецкийдің пікірінше, Украинаның майдан даласында бастаманы өз қолына алып, келіссөздердегі позициясын нығайту үшін 6-дан 9 айға дейін уақыты бар.

Зеленскийдің сөзінше, 2025 жылдың желтоқсанынан бастап Ресей әскерилері үлкен шығындарға байланысты майдандағы басымдықтан айырыла бастаған, бұл Ресей мен Украина арасында келіссөз жүргізуге мүмкіндік беретін терезе ашты.

«Қазір олар бізге жаппай зымырандық соққылар жасай бастады, бұған тағы да негізгі себеп – олардың майдан даласында жеңіле бастауы. Бір айдың ішінде олар жоғалтқан жерлерінен көп аумақты басып ала алмады. Украина мен Ресейде өзара отырып, сөйлесудің жолын табу үшін қысқа дейін уақыт бар. Бірақ бұл Путинге, оның қоғамына жасалатын қысымға және санкцияларды жоймай, жаңасын енгізуге тікелей байланысты», – деді Владимир Зеленский.

Еуропа елдерінің келіссөздер процесіне қатысуы туралы айта келе, Зеленский бұл іске Ұлыбритания, Франция және Германиядан құралған «үштік» атсалыса алатынын болжады. Сондай-ақ ол Ресейге әкетілген украиналық балалар мәселесіне тоқталып, Ресей тарапы балаларды ресейлік әскери тұтқындарға айырбастауды ұсынғанын, бірақ бұл Украина үшін қабылданбайтын шарт екенін жеткізді. Оның үстіне, Ресейге 18 жасқа толмай әкетілген кейбір балалар кәмелеттік жасқа жеткен соң Ресей армиясы қатарында Украинаға қарсы соғысқа жіберілгені туралы мәліметтер бар екенін атап өтті.

Вашингтондағы Соғысты зерттеу институты (ISW) сияқты сарапшылық ұйымдар да наурызда Ресей бақылауындағы Украина аумағының ұлғаймағанын, ал сәуірде тіпті қысқарғанын тіркеген. Бақылаушылар мұны Украинаның дрондар саны мен олардың жауынгерлік мүмкіндіктері бойынша басымдыққа қол жеткізуімен байланыстырады.

Жақында британдық The Economist журналы үкіметтік дереккөздерге сілтеме жасап, Зеленскийдің соғысты тағы «екі-үш» жылға созуға дайындалуды бұйырғанын жазған болатын. Алайда, «РБК-Украина» агенттігінің украин билігіндегі дереккөзі бұл ақпаратты теріске шығарып, «ескі фейк» деп атады. Украина президентінің өзі Ресейге үнемі бітімгершілік ұсынып келеді, ал жуырда Жоғарғы Рада депутаты Ольга Василевская-Смаглюк Зеленскийдің бағалауына сүйеніп, соғыстың «ыстық фазасы» 2026 жылдың қарашасына қарай аяқталуы мүмкін екенін меңзеген еді.