X әлеуметтік желісіне жасалған шабуылды Dark Storm Team хакерлері мойнына алды

10 наурызда X әлеуметтік желісінде ауқымды техникалық ақау болды. Желі иесі Илон Масктың айтуынша, X платформасына күн сайын шабуыл жасалады, алайда бұл жолғы әрекет «не ірі үйлестірілген топтың, не мемлекеттің» ұйымдастыруымен болған.

Fox Business-ке берген сұхбатында Маск шабуылдың Украинада орналасқан IP мекенжайларынан жасалғанын айтты.
Израильдік Check Point Research (CPR) мәліметінше, X желісіне шабуылды Палестинаны қолдайтын Dark Storm Team хакерлік тобы ұйымдастырған. Newsweek-тің хабарлауынша, бұл топ негізінен АҚШ, Украина, БАӘ және Израильдегі ұйымдар мен сайттарды нысанаға алады.

Downdetector сайтына сәйкес, ақаулардың шарықтау шегі Орталық Еуропа уақыты бойынша 15:00-де тіркелді. Бұл уақытта 40 000-ға жуық қолданушы X желісіне кіруде қиындықтарға тап болған.