Wildberries Ресейдегі дрон шабуылдарынан кейін Қазақстаннан қоймалар іздей бастады

Wildberries маркетплейсін дамытып отырған RWB тобы Ресейдегі логистикалық нысандарына жасалған ұшқышсыз ұшу аппараттарының (ҰҰА) сериялық шабуылдары аясында Қазақстанда қойма үй-жайларын іздеуді бастады. Бұл туралы жылжымайтын мүлік нарығындағы дереккөздерге сілтеме жасап «Коммерсантъ» басылымы хабарлады.

Нарықтағы дереккөздердің бірі компанияның Қазақстанда 100 мың шаршы метрге дейінгі алаңды жалға алу мүмкіндігін қарастырып жатқанын жеткізді. Ал екінші дереккөз еліміздегі бос қоймалардың шектеулі ұсынысын ескере отырып, компания барлық қолжетімді нысандарды алуға дайын екенін айтты. Сарапшылардың пікірінше, логистикалық инфрақұрылымның бір бөлігін Қазақстанға орналастыру тауарларды сақтау тәуекелдерін азайтуға мүмкіндік береді.

Осы жағдайға байланысты компанияның ресми позициясы да белгілі болды.

«RWB компаниясы өзі қатысатын барлық елдерде логистикалық нысандар желісін жоспарлы түрде дамытуды жалғастыруда. Қазіргі уақытта барлық ұйымдастырушылық күш-жігер тауарларды тиімді айналымға енгізу және серіктестердің экономикалық тұрақтылығын қамтамасыз ету мақсатында әртүрлі қоймаларға қайта бөлуге бағытталған», – деп мәлімдеді RWB баспасөз қызметі.

Қазіргі таңда RWB Қазақстанда екі ірі логистикалық кешен салып жатыр: Алматыда (ауданы 100 мың шаршы метрден астам) және Астанада (160 мың шаршы метр). Елордадағы нысанды пайдалануға беру келесі жылға жоспарланған.

Айта кету керек, 18 шілдеден бері Ресейдегі Wildberries объектілеріне дрон шабуылдары толастамай тұр. Шабуылдар Мәскеу түбіндегі, Тамбов, Ленинград, Воронеж облыстарындағы, Краснодар мен Ставрополь өлкелеріндегі, сондай-ақ Санкт-Петербург, Симферополь, Екатеринбург және Рязань түбіндегі логистикалық орталықтарға жасалды. Тауарларға келтірілген шығын миллиардтаған рубльге бағалануда. Украина Президенті Владимир Зеленскийдің айтуынша, бұл қоймалар қос мақсаттағы тауарларды – мысалы, дрондар мен навигациялық жабдықтарды сақтау үшін де пайдаланылады.