Wildberries қоймаларын Қазақстанға көшіру туралы ақпаратқа жауап берді

Wildberries пен Russ біріккен компаниясы (RWB) негізгі логистикалық орталықтарын Ресейден тыс жерге көшіреді деген ақпаратты жоққа шығарды. Компанияның баспасөз қызметі ТАСС агенттігіне БАҚ-та жарияланған мұндай мәліметтердің шындыққа сәйкес келмейтінін мәлімдеді.

Компания өкілдерінің айтуынша, Wildberries жұмыс істейтін барлық елде логистикалық инфрақұрылымды жоспарлы түрде дамытып келеді. Сондықтан қойма кешендерінің құрылысы бұрын бекітілген жоспарға сай жалғасып жатыр.

Бұған дейін ресейлік «Коммерсантъ» басылымы дереккөздеріне сілтеме жасап, Украина дрондарының Ресейдегі қоймаларға жасаған шабуылдарынан кейін Wildberries Қазақстаннан шамамен 100 мың шаршы метр қойма іздеп жатқанын хабарлаған еді. Сондай-ақ компания Ресейдегі тәуекелдердің артуына байланысты Қазақстандағы барлық қолжетімді қоймаға қызығушылық танытуы мүмкін екені айтылған.

Қазақстанның Сауда және интеграция министрлігі мұндай мәселе бойынша Wildberries-тен ресми өтініш түспегенін мәлімдеген болатын. Кейін ведомство басшысы Арман Шаққалиев компанияның Қазақстанда шамамен 46 мың шаршы метр қойманы жалға алып отырғанын, сондай-ақ Алматыда 160 мың және Астанада 100 мың шаршы метр болатын екі ірі логистикалық кешен салып жатқанын хабарлады. Оның айтуынша, бұл жобалар соңғы оқиғаларға дейін жоспарланған және 2027 жылдың бірінші тоқсанында пайдалануға беріледі.