"Ұшқыш террорист болуы мүмкін": Трамп пен Нетаньяху Flydubai рейсіндегі оқиғаны талқылады

АҚШ Президенті Дональд Трамп пен Израиль Премьер-министрі Беньямин Нетаньяху Flydubai әуе компаниясының Израильге бағыт алған кезекті рейсінде орын алған төтенше жағдайды егжей-тегжейлі талқылады. Ресми мәліметтерге сәйкес, әуе кемесінің екінші ұшқышы теракт ұйымдастыруды көздеген немесе эмоционалды-психологиялық ауытқуға ұшыраған деген күдік бар. Ол ұшу кезінде әуе кемесінің капитанына шабуыл жасап, ауыр дене жарақатын келтірген.

Капитан алған жарақаттарына қарамастан, бұғатталған болат есікті ашып, борттағыларға дыбыстық белгі беруге үлгерген. Сонымен қатар басқарусыз қалған ұшақ рұқсат етілген шекті нормалардан асып, шұғыл құлдилаған. Төтенше жағдай кезінде кабинаға жақын отырған израильдік жолаушы жедел әрекет етіп, екінші ұшқышты орнынан жұлып алып, кабинадан шығарған. Мұнан соң арнайы дайындығы болмаса да, штурвалды өз бақылауына алып, лайнерді апатты құлдилаудан аман сақтап қалған.

Мәліметтерге қарағанда, аталған жолаушы авиация бойынша негізгі білімді деректі телебағдарламалардан алған. Кейіннен әуе кемесінің кабинасына борттың артқы бөлігінде болған қосымша ұшқыштар мен қауіпсіздік өкілдері келіп, басқаруды өз қолына алған. Дональд Трамп бұл ақпараттың алдын ала деректерге негізделгенін және тергеу амалдары аяқталғанға дейін түпкілікті қорытынды жасауға ерте екенін атап өтті.

Сонымен қатар Президент екінші ұшқыштың ұшақты апатқа ұшыратқысы келгені туралы нақты тұжырым жасаудан тартынды.

 «Олар оның ұшақты апатқа ұшыратқысы келгенін айтады. Бұны әлі ешкім дөп басып айта алмайды», - деді Трамп.