ЦРУ басшысы Ресейге барды: Кремль сапардың мән-жайын айтты

Ресей президентінің баспасөз хатшысы Дмитрий Песков АҚШ Орталық барлау басқармасы басшысының Ресейге сапарына қатысты пікір білдіріп, екі елдің арнайы қызметтері арасында байланыс болғанын растады. Оның сөзінше, ЦРУ басшысы Ресей президенті Владимир Путинмен кездеспеген.

Журналистер Песковтан Путинге келіссөздердің қорытындысы баяндалды ма және Ресей тарапынан кездесуге кім қатысқанын сұрады.

«Арнайы қызметтер желісі бойынша байланыс болғанын ғана айта аламын. Ресей президентімен ешқандай кездесу болған жоқ. Осы тақырып бойынша айта алатыным осы. Әрине, президент Путинге барлық мәселе дереу баяндалады», – деді Песков.

Кремль өкілінен ЦРУ басшысы деңгейіндегі АҚШ шенеунігінің сапары Мәскеу мен Вашингтон арасындағы қарым-қатынасқа оң әсер ете ала ма деген сұрақ та қойылды.

Песков арнайы қызметтер арасындағы байланыстың өзін оң құбылыс деп бағалады. Оның айтуынша, мұндай байланыс екі елдің қарым-қатынасы ең күрделі кезеңдерді бастан өткерген кезде де жалғасып отырған.

«Арнайы қызметтер желісі бойынша байланыстың өзі – оң құбылыс, оң үдеріс. Мұндай байланыстар екіжақты қарым-қатынастың ең қиын кезеңдерінде де жалғасып отырады», – деді ол.

Алайда Песков бұл сапар Ресей мен АҚШ арасындағы қарым-қатынасты қазіргі «терең дағдарыстан» шығаруға қаншалықты ықпал ететінін айтуға әлі ерте екенін жеткізді.