$ 458.87 € 535.09 ₽ 5.42

ЦРУ басшысы Мәскеуге НАТО-ға шабуыл жасауға болмайтынын ескерту үшін барған – БАҚ

Абдрахманов Мағжан
27 тамыз 2026, 09:06
ЦРУ басшысы Мәскеуге НАТО-ға шабуыл жасауға болмайтынын ескерту үшін барған – БАҚ Сурет авторы: Depositphotos

АҚШ Орталық барлау басқармасының директоры Джон Рэтклифф осы аптада Мәскеуге жасаған алдын ала жарияланбаған сапары кезінде Ресейге НАТО елдеріне шабуыл жасауға болмайтынын ескерткен. Бұл туралы The Wall Street Journal мен Politico дереккөздеріне сүйеніп жазды.

Басылымдардың мәліметінше, әңгіме әсіресе Ресеймен шектесетін НАТО мүшелері – Эстония, Латвия және Литва туралы болған.

Бұған дейін The Wall Street Journal АҚШ барлау қызметтерінің тұжырымдарына сүйеніп, Ресей президенті Владимир Путин НАТО-ға мүше елдердің біріне шабуыл жасау арқылы одақтың беріктігін сынауы мүмкін екенін жазған.

Рэтклиффтің Мәскеуге сапары алдын ала жарияланған жоқ. Вашингтон да, Мәскеу де келіссөздердің күн тәртібі мен нәтижелері туралы ресми мәлімет таратпады.

Кремль өкілі Дмитрий Песков Ресей президенті Владимир Путиннің ЦРУ директорымен кездеспегенін мәлімдеді. Оның айтуынша, Рэтклифф Ресейге арнайы қызметтер арасындағы байланыс аясында барған. АҚШ президенті Дональд Трамп бұл сапарды «жартылай қалыпты сипаттағы» сапар деп атаған.

Politico 2021 жылғы қарашада сол кездегі ЦРУ директоры Уильям Бернстің де Мәскеуге барып, Кремльге Украинаға басып кіруге болмайтынын ескерткенін еске салды. Төрт айға жетпей Ресей Украинаға қарсы соғыс бастады.

#ЦРУ #АҚШ #Ресей

Соңғы жаңалықтар