Трамп Путиннің атысты тоқтату туралы мәлімдемесін "үміт күттірерлік", бірақ толыққанды емес деп бағалады

АҚШ президенті Дональд Трамп Ресей президенті Владимир Путиннің Украинадағы атысты тоқтату туралы мәлімдемесін "үміт күттірерлік, бірақ толыққанды емес" деп атады. Бұл туралы Трамп 13 наурызда Вашингтонда НАТО-ның бас хатшысы Марк Рюттемен өткен баспасөз мәслихатында мәлімдеді.

"Бейбіт келісімнің көптеген егжей-тегжейі талқыланып қойды. Енді Ресей бұл келісімге қатыса ма, жоқ па – соны көреміз. Егер Ресей келісімге келмесе, бұл бүкіл әлемді түңілдіретін жағдай болмақ," – деді Трамп.

Ол сондай-ақ Путинмен жеке кездесіп, бұл мәселені талқылауға дайын екенін атап өтті.

Трамп АҚШ-тың Таяу Шығыстағы арнайы өкілі Стив Уиткоффтың Ресейдегі келіссөздеріне сілтеме жасап, олардың сәтті өтіп жатқанын мәлімдеді.

"Олардың сәтті өтіп жатқаны туралы хабар алдық. Бірақ бұл келісім орындалады деген сөз емес. Нақты нәтиже шыққанша ештеңе айта алмаймыз," – деді Трамп.

Бұған дейін Путин Украинадағы соғысты белгілі бір шарттармен тоқтатуға дайын екенін мәлімдеген еді. Ол бейбітшілік ұзақ мерзімді болуы керек екенін және қақтығыстың бастапқы себептері толық шешілуі қажет екенін атап өтті. Сондай-ақ бітім Украинаға қайта қарулануға және қосымша мобилизация өткізуге мүмкіндік бермеуі керек екенін айтты.