Трамп Иранға қарсы ауқымды соққыларды әзірге тоқтата тұрды

АҚШ президенті Дональд Трамп Иранға қарсы әскери қимылды күрт күшейту жоспарын әзірге кейінге қалдырды. The New York Times дерегінше, бұған Таяу Шығыстағы америкалық әуе қорғанысы жүйелеріне арналған зымыран қорының азаю қаупі себеп болған. 

Басылымның хабарлауынша, шешім Трамптың негізгі кеңесшілері және үкімет мүшелерімен өткізген кеңесінен кейін қабылданған. АҚШ Қарулы күштері штаб бастықтары комитетінің төрағасы Дэн Кейн Иранға қарсы ауқымды әскери қимылды қайта бастауға мүмкіндік барын, алайда мұндай қадам АҚШ Орталық қолбасшылығының зымыран ұстап қалуға арналған қорын қауіпті деңгейге дейін азайтуы мүмкін екенін ескерткен. 

Ақ үй өкілдері соғыстың кеңеюі Иранның қарсы шабуылдарын күшейтіп, Парсы шығанағындағы АҚШ одақтастарына қауіп төндіруі мүмкін деп алаңдайды. Бұған қоса, мұнай бағасының өсуі, әлемдік экономикаға түсетін салмақ және босқындар санының артуы да ықтимал салдар ретінде қарастырылып отыр. 

The New York Times дерегінше, АҚШ билігінің бір бөлігі жаңа соққылар Тегеранды келіссөз үстеліне қайтарады дегенге күмәнмен қарайды. Керісінше, әскери қысым Иран билігі мен қоғамын сыртқы қауіпке қарсы жұмылдыруы мүмкін деген пікір бар. 

Қазір Ақ үйде әскери қимылды кеңейтудің орнына Иранмен келіссөзді жалғастырып, экономикалық қысым мен санкцияларды күшейту жолы да қарастырылып жатыр. Трамп бұған дейін Иранға қарсы жаңа соққылар жасауға дайын екенін бірнеше рет мәлімдеген.