Трамп АҚШ-та туғандарға автоматты түрде азаматтық беруді шектейтін жарлықтарға қол қойды

АҚШ президенті Дональд Трамп ел аумағында дүниеге келген балаларға автоматты түрде азаматтық беру құқығын шектеуге бағытталған екі жарлыққа қол қойды. Бұл туралы Reuters хабарлады.

Жаңа құжаттар «босану туризмін», яғни шетелдік әйелдердің баласына АҚШ азаматтығын алу мақсатында елге келіп босануын шектеуге бағытталған. Ақ үй өкілі Стивен Миллер жарлықтарға қол қою рәсімінде мұндай тәжірибеге тыйым салынатынын мәлімдеді.

Жарлықтар АҚШ-та жүрген шетелдік мемлекеттік қызметшілердің балаларына, сондай-ақ «дұшпан шетелдіктер» санатына жатқызылған адамдардың балаларына азаматтық беру тәртібін де шектейді.

Бұған дейін Трамп 2025 жылы қызметіне кіріскен алғашқы күні АҚШ-та заңсыз немесе уақытша жүрген шетелдіктердің балаларына автоматты түрде азаматтық беруді шектейтін жарлық шығарған. Алайда АҚШ Жоғарғы соты бұл шешімді Конституцияға қайшы деп таныған.

Трамп Жоғарғы соттың 30 маусымдағы шешімін сынға алып, «босану туризмі» арқылы пайда табатын кәсіп қалыптасқанын айтты. Бұдан кейін ол Конгресті тиісті заң қабылдауға шақырған еді.

АҚШ Конституциясының 14-түзетуі ел аумағында дүниеге келген және АҚШ юрисдикциясына бағынатын адамдарға азаматтық берілуіне кепілдік береді. Тарихи тұрғыда бұл ережеге шетелдік дипломаттардың балалары секілді санаулы ерекшелік қана қарастырылған.