Трамп АҚШ-қа көшкісі келетіндерге арнап «алтын карталар» шығармақ

АҚШ президенті Дональд Трамп бай шетелдіктерге елде тұруға және жұмыс істеуге құқық беретін «алтын карталар» сатылатынын мәлімдеді. Бұл құжат оларға грин-картамен бірдей артықшылықтарды пайдаланып, болашақта азаматтық алу мүмкіндігін береді.

«Біз «алтын картаны» сатқалы жатырмыз. Грин-карта бар, ал бұл – алтын карта. Оның бағасы шамамен 5 миллион доллар болады. Осы картаны сатып алғандар грин-карта иелері сияқты құқықтарға ие болады және АҚШ азаматтығын алуға жол ашылады», – деді Трамп Оваль кабинетінде өткен баспасөз мәслихатында.

АҚШ-тың Сауда министрі Говард Лютниктің айтуынша, жаңа бастама қазіргі EB-5 иммиграциялық визасын алмастырады. Президент Трамп бұл бағдарламаны бірнеше апта ішінде іске қосуды жоспарлап отыр.

Журналистердің «алтын картаны» ресейлік олигархтар сатып ала ала ма?» деген сұрағына Трамп: «Иә, мүмкін. Мен бірнеше ресейлік олигархты білемін, олар өте жақсы адамдар», – деп жауап берді.