Трамп әкімшілігі 175 мыңнан астам визаның күшін жойды

АҚШ президенті Дональд Трамп әкімшілігі көші-қон саясатын қатаңдату аясында шетел азаматтарына берілген 175 мыңнан астам визаның күшін жойды. Бұл туралы АҚШ Мемлекеттік департаментіне сілтеме жасап Reuters хабарлады.

Мемлекеттік департамент визасы қайтарылғандардың қатарында елде болу талаптарын бұзған, қылмыс жасаған, АҚШ азаматтарына қарсы зорлық-зомбылыққа шақырған, көші-қон жүйесін теріс пайдаланған немесе ұлттық қауіпсіздікке қатер төндірген адамдар бар екенін мәлімдеді.

Визалардың басым бөлігі құқық қорғау органдарымен байланысты оқиғалардан кейін жойылған. Ведомство негізгі себептердің қатарында шабуыл жасау, мас күйінде көлік жүргізу, ұрлық және есірткіге байланысты қылмыстарды атады. Сондай-ақ зорлау және жыныстық зорлық-зомбылық, адам ұрлау мен адам саудасына қатысты айып тағылған адамдардың да визалары қайтарылған.

Бұдан бөлек, АҚШ-тың Солтүстік Африкадағы елшілігі елге бала босану мақсатымен барған ата-аналардың 100-ден астам визасының күшін жойған. Мемлекеттік департамент консерватив белсенді Чарли Кирктің өлтірілуін құптаған бірнеше шетел азаматының да визасын қайтарып алған.

Биыл қаңтарда Мемлекеттік департамент 100 мыңнан астам визаның күшін жойғанын хабарлаған еді. Ол кезде бұл бұрын-соңды болмаған көрсеткіш ретінде аталған.

Өткен аптада Трамп АҚШ-та дүниеге келген адамның азаматтық алу құқығын шектеуге бағытталған екі жарлыққа қол қойды. Ақ үй бұл құжаттар елге арнайы бала босану үшін келу тәжірибесін шектеуге бағытталғанын мәлімдеді.