Ресейді соғысты тоқтатуға мәжбүрлейтін жоспар: Зеленский жаңа бұйрыққа қол қойды

Украина Президенті Владимир Зеленский соғысты тоқтату үшін басқыншы мемлекетке ықпал ету мақсатында 40 күндік арнайы операцияны бекітті, деп хабарлады мемлекет басшысы өзінің ресми телеграм-арнасында.

Зеленский бұл шешімді генерал-майор Евгений Хмараның Украина қауіпсіздік қызметіне қарасты «Альфа» арнайы операциялар орталығының майдандағы жұмыс нәтижелері туралы есебін тыңдағаннан кейін қабылдаған.

«Соғысты тоқтату үшін басқыншы мемлекетке ықпал ету мақсатында [Украина қауіпсіздік] қызметіне арналған 40 күндік операцияны бекіттім», – деп жазды Украина президенті.

Ол жоспарланған операцияның нақты жай-жапсары мен егжей-тегжейіне тоқталмады. Дегенмен мемлекет басшысы түрлі дрондарды тиімді пайдаланудың арқасында майдандағы позицияларды қорғаудың ең жоғары көрсеткіштеріне қол жеткізілгенін ерекше атап өтті.

Бұл мақсаттарды жүзеге асыратын «Альфа» орталығы терроризмге қарсы күрес және тылдағы арнайы операциялар бойынша маманданған. Аталған бөлім осыған дейін, атап айтқанда маусым айының басында Кронштадтқа, Ленинград облысындағы әскери-теңіз арсеналына және Кубаньдағы Усть-Лабинск мұнай қоймасына жасалған шабуылдарды тікелей ұйымдастырған болатын.

Соңғы уақытта Украина қарулы күштері Ресейдің энергетикалық инфрақұрылымдарына жасалатын соққыларды айтарлықтай үдетті. Мәселен, мамыр айында Ресейдің 16 мұнай өңдеу зауытына шабуыл жасалып, оның сегізі бұл саладағы ең ірі он кәсіпорынның қатарына кіретіндігі белгілі болды. Украиналық дрондардың сәтті соққылары ресейлік зауыттардың айтарлықтай бөлігін істен шығарып, елдің көптеген аймағында жанармай тапшылығы мен бекеттердегі ұзын-сонар кезекке алып келді.