Ресей президенті 24 наурызды аза тұту күні деп жариялады

Ресей президенті Владимир Путин 24 наурызды Мәскеу түбіндегі "Крокус сити холдағы" теракт құрбандарын жалпыұлттық аза тұту күні деп жариялады.

Аталған концерт залдағы атыс пен өрттің салдарынан кемінде 115 адам қаза болған. Қаза тапқандар саны артуы мүмкін. Ресей президенті халқына видеомәлімдеме жасады.

Путин "Крокус сити холдағы" терактіні "қанды оқиға" деп атап, адамдарды құтқаруға көмектескендердің барлығына алғыс айтты. Оның сөзінше, Мәскеу мен Ресейдің өзге аймақтарында терроризмге қарсы қосымша күрес шаралары жүріп жатыр.

Ресей президенті сонымен бірге оқиғаға кінәлілер жазаланатынын мәлімдеді. Ол терактіге қатысы барлар ұсталғанын да атап өтті. Путиннің сөзінше, ұстау алдында күдіктілер Украинаға кетуге талпынған. Оның айтуынша, Украина жағы олардың ел аумағынан кетуіне "жағдай жасаған", бірақ жай-жапсарын айтпады.

Путин терактіге қатысы барларды анықтаумен арнайы қызмет айналысып жатқанын жеткізді.