Путин Украинаға тікелей келіссөздерді қайта бастауға ұсыныс жасады: Зеленский жауап берді

Ресей Президенті Владимир Путин Украинаға 15 мамырда Стамбұлда тікелей келіссөздерді бастауға ұсыныс жасады. Оның айтуынша, бұл келіссөздер «ешқандай алдын ала шартсыз» өтуі мүмкін. Бұл туралы ол түнгі уақытта Кремльде сөйлеген сөзінде мәлімдеді.

Путин батыс елдерінің Украинаға қолдау білдіре отырып ұсынған 30 күндік бітім идеясына қарсы екенін айтып, бастаманы Киевке берді.

«Енді доп Украина жағында», — деді ол.

Бұған дейін АҚШ, Германия, Ұлыбритания, Франция, Польша және Украина көшбасшылары Ресейге 12 мамырдан бастап бір айға созылатын бітім жариялауды ұсынған болатын. Бұл Мәскеу бұған дейін жариялаған үш күндік бітімнің жалғасы болар еді.

Украина жауабы

Украина Президенті Владимир Зеленский бұл ұсынысқа дереу жауап беріп, басты шарт — атысты тоқтату екенін айтты.

«Ресейліктер соғысты тоқтату жайлы ойлана бастағаны — жақсы белгі. Бұл шешімді әлем ұзақ күткен. Кез келген соғысты тоқтатудың алғашқы қадамы — атысты доғару. Адам өлтіруді жалғастырудың еш мәні жоқ. Ертең, 12 мамырдан бастап, Ресей атысты толық, ұзақ мерзімді және сенімді түрде тоқтататынын растайды деп үміттенеміз. Украина келіссөзге дайын», — деді ол әлеуметтік желіде.