Путин 160 мың адамды әскерге шақыру туралы жарлыққа қол қойды

31 наурызда Ресей президенті Владимир Путин көктемгі әскерге шақыру туралы жарлыққа қол қойды. Құжатқа сәйкес, 2025 жылдың 1 сәуірінен 15 шілдесіне дейін Ресей армиясына 160 мың адам шақыртылмақ.

Сол күні Ресей Қорғаныс министрлігі азаматтарға электронды шақыру қағаздары жіберілетінін хабарлады. Ол "Мемлекеттік қызметтер" порталындағы жеке кабинетке жолданады. Мәскеу қаласының шақырылушыларына mos.ru арқылы жолданады. Бұған қоса, қағаз түріндегі шақырулар әлі де заңды күшінде қала бермек.

Жаңа заңдарға сәйкес, мерзімді әскери қызметке 18 бен 30 жас аралығындағы азаматтар шақырылады.

Биылғы шақырылушылар саны 2011 жылдан бергі ең жоғары көрсеткіш болып отыр. Сол жылы Ресей Қорғаныс министрлігі әскерге шақыру санын екі есе қысқартқан еді. Салыстыру үшін: 2024 жылы көктемгі шақыруда 150 мың адам, 2023 жылы – 147 мың, 2022 жылы – 134,5 мың адам әскерге алынған.

Министрлік өкілдері көктемгі әскерге шақыру Украинадағы соғысқа қатысы жоқ екенін және шақырылушылар Ресей оккупациялаған Донецк, Луганск, Херсон және Запорожье облыстарына жіберілмейтінін мәлімдеді.

Айта кетейік, ақпан айында Ресей Мемлекеттік Думасына әскерге шақыруды күшейтетін заң жобалары ұсынылған болатын. Бірінші заң жобасы шақыру мерзімінің күшін бір жылға дейін ұзартуды көздейді. Бұл – көктемгі шақыртулар күзде де жарамды болады деген сөз. Екінші заң жобасы тұрғылықты жерін ауыстырғаны туралы хабарламаған шақырылушыға 10 000–20 000 рубль көлемінде айыппұл салуды қарастырады.