Politico: Трамптың айналасындағы адамдар Украина оппозициясымен жасырын келіссөздер жүргізген

АҚШ президенті Дональд Трамптың жақын серіктестерінен тұратын төрт жоғары лауазымды тұлға Украина оппозициясының өкілдерімен құпия кездесулер өткізді. Бұл туралы Politico басылымы хабарлады.

Кездесуге «Батькивщина» партиясының жетекшісі Юлия Тимошенко, сондай-ақ экс-президент Петр Порошенконың «Еуропалық ынтымақтастық» партиясының мүшелері қатысқан.

Басылымның мәліметінше, тараптар Украинада президенттік сайлауды ауқымды бейбіт келіссөздер басталғанға дейін өткізу мүмкіндігін талқылаған. Қазіргі таңда елдегі соғыс жағдайына байланысты сайлау кейінге шегерілген.

Politico дереккөздерінің айтуынша, Трамптың серіктестері қоғамдағы соғысқа деген шаршаңқылық пен Украинадағы жемқорлық мәселелерін ескере отырып, қазіргі президент Владимир Зеленскийдің сайлауда жеңіске жете алмайтынын болжайды.

Басылымның хабарлауынша, Тимошенко мен Порошенко Трамп әкімшілігі ұсынған шарттарға келісуге бейімірек болуы мүмкін.

Ақпан айының ортасында Дональд Трамп Зеленскийді «сайлаусыз отырған диктатор» деп атаған. Кейінірек ол өз сөзін жоққа шығарып, бұлай айтқанына сенбейтінін мәлімдеді. Politico мәліметінше, Трамптың жақтастары Зеленскийге АҚШ-тың соғысты тезірек тоқтату жоспарын толық қолдамаса, отставкаға кетуді ұсынған.

Басылым сондай-ақ Кремльдің де Украинада мерзімінен бұрын сайлау өткізу идеясын қолдайтынын атап өтті.