Өзбекстанда келінін өзіне қол жұмсауға дейін жеткізген ене 5 жылға сотталды

Өзбекстанның Қашқадария облысында сот келінін өзіне қол жұмсауға дейін жеткізген 47 жастағы жергілікті тұрғынды 5 жылға бас бостандығынан айырды. Бұл туралы елдің Жоғарғы соты хабарлады.

Сот мәліметінше, айыпталушы бірнеше жыл бойы келініне физикалық және психологиялық қысым көрсеткен. Тергеу барысында оның 2022 жылдан 2025 жылдың қазан айына дейін бойжеткенді жүйелі түрде балағаттап, ұрып-соғып, үйден қуып шыққаны және туыстарымен араласуын шектегені анықталды.

Іс материалдарына сәйкес, енесі келініне телефон пайдалануға тыйым салып, ұрыс-керіс кезінде оның шашынан жұлып, далаға сүйреп шығарған және денесіне соққылар жасаған. 2025 жылдың 2 қазанында ұзақ жылғы қысымға шыдамаған жас келін қорада асылып қайтыс болды.

Сот енесінің әрекетін трагедияның басты себебі деп танып, оны Өзбекстан Қылмыстық кодексінің 103-бабы 2-бөлігінің «а» тармағы («Кінәліге материалдық немесе өзге де тәуелділікте болған адамды өзіне қол жұмсауға дейін жеткізу») бойынша кінәлі деп тапты.