Өзбекстанда балаға әкесінің есімін тегі ретінде беруге рұқсат етілді

Өзбекстан Республикасында балаға тегін беру тәртібіне елеулі заңнамалық өзгерістер енгізілді. Енді ел азаматтары ұлттық дәстүрлерге сәйкес балаға әкесінің есімін, сондай-ақ әкесі немесе анасы жағынан аталарының есімін тегі (фамилиясы) ретінде бере алады. Тиісті түзетулер Еңбек және Отбасы кодексіне, сондай-ақ бірқатар заңнамалық актілерге енгізілді, деп хабарлайды Huquqiy axborot.

Бұған дейін қолданыста болған Отбасы кодексінде балаға әкесінің есімін тегі ретінде таңдау мүмкіндігі қарастырылмаған болатын. Жаңа нормалар халықтың ұлттық тамыры мен отбасылық дәстүрлерін сақтауға бағытталған.

Сонымен бірге заңнамалық өзгерістер мұрағат ісі саласын да қамтыды. «Мұрағат ісі туралы» заңға енгізілген түзетулерге сәйкес, мемлекетте электрондық және жеке мұрағаттарды құруға ресми түрде рұқсат берілді.

Мұрағат саласындағы жаңа талаптар:

• Электрондық мұрағаттар құжаттарды оцифровкалауға арналған арнайы аппараттық-бағдарламалық құралдармен жабдықталуы тиіс.
• Мұрағаттық электрондық жүйелер ақпараттық және киберқауіпсіздік талаптарына толық сай болуы шарт.

Жеке мұрағаттар Ұлттық мұрағат қорының мемлекеттік емес бөлігіне жататын құжаттарды сақтау және есепке алу мақсатында құрылады.

Жаңа заң сонымен қатар мұрағат ісін реттеудегі Өзбекстан Республикасы Әділет министрлігінің өкілеттіктерін айқындап берді. Заңнамалық актілер ресми түрде жарияланған күнінен бастап өз күшіне енді.